Fa’afetai Joseph i le Tapua’iga a Samoa

Joseph

Ali’i fusu ia Joseph Parker ma ona aiga

O le malaga mai ai o le ali’i lauiloa i le ta’aloga o le fusu, le ali’i o Joseph Parker e fai malologa ai i Samoa nei fa’atasi ai ma ona mātua, sa maua ai fo’i ma se avanoa e momoli mai ai lana fa’afetai i ona aiga uma i Samoa nei, aemaise ai le tapuaiga mamalu a Samoa, ona ua a’e ma le manuia le fa’atamasoāli’iga.

I se fa’atalatalanoaga ma le ali’i o Joseph Parker, sa ia tā’ua ai le feagai ai o ia ma ana ta’aloga ua mavae e lē o se mea faigofie, ae ona o le mana o talosaga a le mamalu o si o tatou atunu’u, fa’atasi ai ma le fa’amalosi’au atu a lona tinā ia te ia, ua manuia ai ana taumafaiga.

O le susuga ia Joseph Parker, o se alo e fa’asino i le tinā ia Sala ma le tamā ia Dempsey Parker, ma o lo’o aumau o ia ma ona mātua i Aukilani i Niu Sila, ma o lo’o i ai fo’i ona āiga i Samoa nei, lea o lo’o fai malologa mai ai fa’atasi ai ma ona mātua ma fai aso fiafia mai ai.

O Joseph ua 22 nei ona tausaga, o se tasi o alo a Samoa ua mafai ona ta’alo ma ofi atu i le isi la’asaga maualuga fa’apolofesa i le ta’aloga lenei o le fusu.

I se fa’amatalaga pu’upu’u a le tinā ia Sala e uiga i le olaga o lana tama o Joseph, sa le’i manatu e ūna’ia pe fa’amalosia Joseph e koleni ma ta’alo i lea ta’aloga, ona sa i ai lona popolega ne’i lavea ai lana tama. Pau lava lona naunauta’iga, ia koleni lana tama i le fusu, ona o le puipuia mai ai o ia ne’i fasi e se isi ae o lo’o mafai lava e ia ona ia puipuia ia lava (self defence) ae lē o le koleni e alu ai e tauvā pe fusu i le maea.

Peita’i na fa’ailoa mai fo’i e Joseph Parker, o le miti po’o le lu’itau lea a lona tamā ia te ia, ina ia koleni ma fa’aauau lana taleni lea o le fusu, ma o le lu’i foi lea i lona tagata fusu, ia fa’ataunu’u le mana’oga o lona tamā.

Na saunoa Sala, i le taimi muamua lava a’o sauni ta’aloga a Joseph, sa ia te ia le popole ma le fefe i se tulaga e o’o ai Joseph i ana ta’aloga. Peita’i ile taimi nei, ua lē toe iai se popole, ua iai lona talitonuga i lana tama.

 

Post Tagged with ,

by

Related Posts

Social Icons