Fealofai Le Pulega SSFA, e le Fia Faailoa Mai

s-1

Malae fusu ua faaleagaina.

Talauega Lafi Onesemo

O le Aso Toona’i, aso 13 o Setema, na maua mai ai se telefoni mai le malae taalo ile Apia Park, ma fa’ailoa mai ai se faafitauli o lo’o tula’i mai ai. I le taunu’u atu ile Malae Apia Park, sa tau saili po’o gafea tonu o lo’o tupu ai le faafitauli, ona e foliga e tu’ufua le nofoaga atoa, vaganā ai se tamaititi o lo’o nofonofo i lalo o le mago e aga’i i totonu o le faleta’alo autū, ma tama e toalua ma teine e toalua o lo’o nofonofo ile fa’asitepu e ulufale ai i totonu o le fale ta’alo autū lea. Sa fesiligia i latou nei, pe iai se mea o tupu, ae po’o iai foi nisi o i totonu o le malae o fa’aaogāina i lea taimi. E lē iloa. Ona fa’aauau pea lea o e sailiga.

O le fale ta’alo o lo’o i tua atu o le fale ta’alo autū, na faato’ā iloa ai ni alii e foliga o lo’o fai sa latou fonotaga, ma o lo’o tutū i o latou luma se ipu e foliga o se ipu o se tauvaga. I o latou tua, o lo’o tu ai se maea fusu, ua taselei (tulou), ma ua motusi, ma ua fa’aleaga le tele o ona vaega.

O le molimau a e sa iai, o le po o le Aso Faraile, na molimauina e fa’apea na fa’aleagaina ai, ma o le maea fusu, e tumau lava i totonu o le faleta’alo lea e i tua o le faleta’alo ‘autū. Na fa’amaonia mai ua lata ile lua masina o iai pea lea maea fusu, o le fata maualuga, ma le fa’atafafā e si’omia i maea nailoni, e tolu laina fa’asolosolo aga’i ile tumutumu.

O le maea o le mea totino a le fa’alapotopotoga maea fusu a le Tumua ma Puleono ma le Aiga Fealofani. O Aso To’onai uma o vaiaso taitasi talu ona fa’aaogāina lea nofoaga e fai ai a latou ta’aloga, ma koleniina ai le fanau laiti e a’oa’o ai le taleni, e fa’asolo ai i luga.

O le taeao la lea o le Aso Toona’i, na le mafai ona fa’ataunu’uina le fa’amoemoe, ona ua fa’aleaga e le tagata po’o ni tagata lea le maea fusu sa fa’amoemoe iai ia toleniga.

Sa fesiligia i latou sa iai, e aofia ai ma sui o le pulega a le Apia Park, pe iai nisi sa leoleoina le lotoā ile po? E le’i manatu le sui o le pulega, e fa’ailoa lona suafa, pe tali mai foi e tusa o le fa’afesili, ae fa’aali lona uiga to’atāma’i ina ua iloa o le Sui o le nusipepa lea o lo’o latou talanoa.

Sa fesiligia e sui o le nusipepa, po’o ai e fītoi tonu iai le va’aiga o le Apia Paka, ma sa le tali mai. Ona fautua lea e le sui o le nusipepa, o fale ma malaeta’alo, ma meatotino i totonu o le Paka, e i lalo uma o le vaaiga a le pulega, a le Apia Park Board, ma afai ua suia lea tulaga po’o ai la le vaega e vaaia ile taimi nei. E le’i tali le sui o le pulega.

I le suesuega a le Iniini, na iloa ai ma fa’amaonia, e tolu laina telefoni a pulega o le Apia Park, e le o toe fa’aaogāina. O le taumafai e vili ia numera e tolu, na iloa ai ile fe’au fa’alauiloa o lo’o sau ai i numera ia, “O le numera sa e viliina ua le o toe fa’aaogāina.” O numera e tolu e aofia ai le 26366, 21465 ma le 21400. O nei numera uma, o numera sa fa’aaogāina e le Apia Park Board.

Ina ua taumafai le Iniini e saili po’o ai e fitoi tonu ma le vaaiga o le Apia Park, ma iloa, o le Samoa Sports Facilities Authority. E fa’afā ona vili le telefoni, ma tali mai e le teine, ona fa’apenā lea ona fetu’utu’una’i solo le telefoni.

O le tagata mulimuli lava e tu’u atu iai le telefoni, e na o le tatagi lava, ona toe fa’apea mai lea o le teine, “..ua toe fiti mai le call.”

Sa toe taumafai foi, ma fa’atonuina e vili atu le numera lea e tasi, ona talosaga lea e vili le laina fa’aauau numera 27, mo le susuga a Nafoitoa, poo Nafoi Toa.

E fa’atolu ona vili, ae ese le tagata e taliina ma fa’amalulu mai e le o iai ile ofisa i lea taimi.

Sa toe vili foi ma fa’apenā ona poloa’iina ma le fa’aaloalo, mo se avanoa e talanoa ai.

E o’o mai ile ta o le ono ile afiafi, e le maua lava se feso’otaiga.

O le fesili sa fia fesiligia ai, pe na fa’ataga aloa’ia e le Pulega fusuaga nei e faia i Aso Toona’i uma, afai o lea, pe na lipoti ile ofisa o leoleo le fa’aleagaina o mea totino nei, sa i lalo o le latou vaaiga?

 

Post Tagged with

by

Related Posts

Social Icons